Është ndarë nga jeta në moshën 70-vjeçare historiani, filologu dhe përkthyesi i njohur shqiptar, Jorgji Qirjako. Ai u nda nga jeta në Londër, ndërsa lajmin e trishtë e kanë bërë me dije miqtë e tij në rrjetet sociale.
Qirjako ka përkthyer rreth 70 vepra, ndërsa në shkurt të këtij viti u dekorua nga Presidenti Ilir Meta me titullin “Mjeshtër i Madh”. Ky titull iu dha me motivacionin: “Në vlerësim të veprës së palodhur e të çmuar si përkthyes veprash politike, shoqërore dhe letërsi artistike dhe të kontributeve të spikatura në ekspeditat arkeologjike, etnografike dhe folklorike në Kolonjë, duke i përfaqësuar me dinjitet dhe lartësuar vlerat e tyre të rrallë në festivale kombëtare dhe ndërkombëtare. Me mirënjohje për evidentimin e traditave atdhetare, kulturës popullore dhe figurave të shquara të historisë sonë kombëtare”.
Qirjako udhëhoqi veprimtarinë kulturore dhe artistike në rrethin e Kolonjës për rreth 25 vjet. Ai dha një kontribut të veçantë në drejtimin dhe organizimin e ekspeditave arkeologjike, etnografike dhe folklorike e po ashtu në përfqësimin me dijnitet të grupeve përfaqësuese të Kolonjës në festivalet kombëtare dhe ndërkombëtare.
Meritë e tij e veçantë është evidentimi i traditave patriotike të kulturës popullore e gjithashtu figurave të shquara të historisë kombëtare, me anë të studimeve, organizimit të sesioneve shkencore dhe nëpërmjet disa botimeve monografike.
