Një lajm i trishtë vjen ditën e sotme për artin shqiptar, teksa është ndarë nga jeta në moshën 86-vjeçare, Mjeshtri i Madh i humorit shkodran dhe mbarë shqiptar, Paulin Preka.
Preka, një emër i madh i humorit shqiptar, ka mbyllur sytë përgjithmonë në Itali, ku jetonte prej vitesh së bashku me familjen. Ai është pjesë e asaj kaste aktorësh të mëdhenj të humorit, emri i të cilit do të mbetet përgjithmonë në historinë e artit shqiptar. Bëhet me dije se Prek është ndarë nga jeta pas një sëmundje.
Rolet e tij në teatër dhe kinematografi janë me dhjetra, ndërsa aktori i madh spikati me estradën e Shkodrës në vend dhe më tej.
Jeta dhe vepra:
Paulin Preka lindi në vitin 1935 në Shkodër. Shkollën e mesme e kreu në qytetin e lindjes dhe spikati nq Lqvizjen Amatore e më pas u tërhoq si aktor profesionist në Estradën e Shkodrës duke krijuar aty nje profil artistik origjinal gjatë me shumë se 40 viteve karrierë. Aktrimi i tij spikati posaçërisht në mishërimin e personazheve pozitive, ku ai ishte i hijshëm, i natyrshëm dhe fin në skenë.
Bashkë me aktorët e tjerë të mirënjohur të kësaj estrade, si Tano Banushi, Hasan Smaja, Zyliha Miloti dhe Zef Deda, ai ka luajtur shumë pjesë e komedi të shkruara për estradë (Daja i burrit, Dhëndri nga Amerika, Fotografisti, Toka jone, Kunati i shokut Xhemal, Trualli i zënë etj). Ai është nderuar me titullin “Artist i merituar”.
