Jetojmë në vitin 2020, dhe ende flitet për ujin në rubinetat tonë. Të vjen keq, kur ende ndërtohen raporte se sa përqind e familjeve të shtetit tonë mbulohen nga furnizimi me ujë.
Këtë tregon në raport edhe Bilanci i Ujit për vitin 2019. Të dhënat nga Enti Rregullator i Ujit tregojnë ndarjen me tre grupe të ujësjellësve, ku treguesi i mbulimit të zonave ujë varion nga 83% deri në 56% të popullsisë.
Diçka vëretë e trishtë, kur shikon njësitë vendore që merren me fasada apo rregullime sheshesh, dhe kanë lënë në harresë një problem të vërtetë dhe real për banorët, që është ai i furnizimit me ujë në rubinetat e tyre.
Për shoqëritë e grupit të parë, që janë ato me më shumë se 15 mijë lidhje uji, mbulimi arrin të bëhet në 83% të popullsisë.
“Theksohet fakti që në shoqëritë UK Korçë dhe Pogradec që 100% e konsumatorëve familjarë janë me matje, sasia e ujit të prodhuar është në vlerat rreth 80 litra/ditë, banor. Problemi i cilësisë së shërbimit të furnizimit me ujë me ndërprerje qëndron në nivelin e madh të humbjeve të përgjithshme, ulja e të cilëve me ruajtjen e së njëjtës sasi prodhimi do të sjellë rritjen e kohës së furnizimit me ujë për konsumatorët” thuhet në raport.
Sipas konstatimit të ERRU, mungesa e matësve në prodhim e mos zëvendësimi i tyre në rast defektesh mbetet faktor në luhatjen e nivelit të matjes për ujin e prodhuari dhe përcaktimin real të nivelit të humbjeve në sektor.
Ndërkohë, grupi i dytë i shoqërive përfshin ato të cilat kanë 3.000-15.000 lidhje uji. Shërbimi arrin të bëhet në 65% të popullsisë.
“Për shumicën e shoqërive, të cilat disponojnë kapacitete të mjaftueshme për furnizimin pa ndërprerje të popullsisë, nevojitet reduktimi i humbjeve të ujit nëpërmjet menaxhimit më të mirë të shoqërisë shoqëruar me investime të reja” vëren raporti i ERRU.
Shoqërisë që bëjnë pjesë në grupin e tretë janë ato më të voglat, dhe me më pak fuqi financiare, dhe numërojnë më pak se 3 mijë lidhje uji. Ato kanë një shërbim që arrin të mbulojë 56% të popullsisë në zonën që kanë nën juridiksion.
“Problemi i cilësisë së shërbimit të furnizimit me ujë me ndërprerje qëndron në nivelin e madh të humbjeve të përgjithshme, ulja e të cilëve me ruajtjen e së njëjtës sasi prodhimi do të sjellë rritjen e kohës së furnizimit me ujë për konsumatorët. Mungesa e matësave në prodhim dhe mos zëvendësimi i tyre në rast defektesh mbetet faktor në luhatjen dhe nivelin e ulët të matjes për ujin e prodhuar si dhe përcaktimin real të nivelit të humbjeve në grup” thuhet në dokument.
/Burimi: Monitor.al/GazetaReforma.com/
