Një anëtar i bandës së Nuredin Dumanit ka rënë në prangat e policisë ditën e sotme. 49-vjeçari i arrestuar ishte shpallur në kërkim 3 muaj më parë me urdhër të SPAK. Ai akuzohet pr një ngjarje të vitit 2013 ku u vodh me dhunë Astrit Ademi, në një pikë të mjeteve të përdorura në fshatin Marikaj të Vorës. Në dëshminë e tij këtë grabitje, Dumani tha se e kishte kryer me Talo Çelën dhe Agim Gjinin.
Pronarit të makinës që kishte shkuar si klient tek servisi ata arritën t’i marrin shumën prej 16 mijë eurosh, një telefon me dy karta si dhe 760 mijë leke që i gjetën në bagazhin e makinës.
Gjatë deklarimeve, Dumani tha se ata kishin shkuar për të grabitur një benz 250 të vjedhur, me targa po të vjedhura. Të gjitha sendet që vidhnin sipas të penduarit të drejtësisë i linin tek garazhi i Agim Gjinit.
Pas grabitjes, shkuan tek garazhi i Gjinit dhe ndanë lekët, ku ai mori rreth 4500 euro.
49 vjeçari Agim Gjini është shoqëruar edhe për vrasjen e Elvis Dedaj në vitin 2013.
Me arrestimin e tij, numri i të prangosurve nga operacioni “Golden Bullet” i finalizuar pas dëshmisë Nuredin Dumanit, shkon në 19. Policia dhe SPAK goditën 8 grupe kriminale, ndërsa disa persona të tjerë vijojnë të jenë në kërkim.
