Drejtori i Përgjithshëm i Policisë së Shtetit Ardi Veliu, së bashku me Zv.drejtoren e Përgjithshme Aida Hajnaj kanë pritur në një takim Zaida Çobo, të cilës vetëm një javë me parë, Veliu i publikoi videon me armë, moment ky që nuk kaloi pa u komentuar gjatë në media.
Foton e takimit, Veliu e ka publikuar edhe në rrjetet sociale, krah të cilës shkruan se i kërkon ndjesë edhe një herë Zaidas.
Ai shkruan se është i keqardhur për komentin dhe shpreson që të jetë kuptuar nga të gjithë që ato fjalë nuk kishin qëllim fare të justifikonin policin.
“Sot u takuam me zonjën Zaida Çobo, e cila me të drejtë u ndje e lënduar nga komenti im që mori edhe shumë kritika publike. Dëshiroja që ndjesën time publike t’ia bëja zonjës personalisht dhe më vjen mirë për mirëkuptimin e saj. Përfitoj nga rasti ta përsëris edhe njëherë që jam i keqardhur për komentin tim dhe shpresoj që të jetë kuptuar nga të gjithë që ato fjalë nuk kishin qëllim fare të justifikonin policin (i cili është pezulluar menjëherë pas ngjarjes). Po ashtu nuk më ka shkuar kurrë mendja të lëndoj zonjën apo familjen e saj me atë koment. Ndjesë edhe njëherë!”- shkruhet krah fotos.
https://www.facebook.com/policiashtetitshqiptar/photos/a.1503908149895551/2770338489919171/?type=3
Disa ditë në parë drejtori i Policisë së Shtetit, Ardi Veliu gjatë raportimit në mbledhjen online të Komisionit të Sigurisë, tregoi një video, ku Zaida Çobo, e ëma e 15-vjeçarit të dhunuar, mbante një pistoletë në dorë, gjë që ngjalli një lumë reagimesh nga radhët e opozitës por edhe nga gazetarë, politikanë e qytetarë.
Kjo pasi më vonë rezultoi se videoja e shfaqur nga ai nuk ishte asgjë më shumë se një pjesë filmi, ku Çobo ka qenë aktore në filmin “Dashuria s’mjafon”, që është shfaqur një vit më parë në kinematë shqiptare.
Si kundërpërgjigje ndaj këtyre zërave, reaguar atë ditë vetë Veliu, i cili përmes një deklarate, thekson se është i keqardhur që Policia e Shtetit bëhet rregullisht shënjestra e atyre që kurrë nuk e thanë një fjalë motivuese për të.
Në fund, kreu i Policisë e mbyll me një ndjesë për keqkuptimin e krijuar.
Nga ana tjetër, më herët Çobo e ka përgënjeshtruar Veliun dhe paralajmëroi se do bëjë padi në prokurori ndaj tij për “prishje imazhi”.
