Një 39-vjeçare është vënë në prangat e policisë në Tiranë, për shkak se ka goditur me grusht një polic dhe një roje te Spitali i Traumës. Burime bëjnë me dije për ZËRI-n se në pranga ka rënë shtetasja Hënxa Deliu, ke cila ka kafshuar në shpatull policin që shkoi pasi e thirri roja. Mësohet se shkak për sherrin është bërë pengimi i gruas nga roja, që të hynte dhe të shihte djalin e saj, i cili ishte duke marrë mjekim në ato momente.
“Specialistët për Hetimin e Krimeve të Komisariatit të Policisë Nr. 3 arrestuan shtetasen H. D., 39 vjeçe, banuese në Tiranë, për veprat penale “Kundërshtimi i punonjësit të policisë së rendit publik” dhe “Goditjet për shkak të detyrës”, parashikuar nga nenet 236 dhe 237 të Kodit Penal. Kjo shtetase, në ambientet e SUT, ka kundërshtuar me forcë e ka goditur një punonjës Policie dhe një punonjës për shërbimin privat të sigurisë fizike”,thuhet në njoftimin e policisë së Tiranës.
