Një ngjarje e rëndë ka ndodhur në bllokun e sigurisë në Tiranë, ku një person i ndaluar është vetëvarur gjatë orëve të natës.
Sipas njoftimit të policisë, rreth orës 01:20, në dhomën nr. 8 është gjetur i vetëvarur 46-vjeçari Donald Greku, i dënuar për vjedhje. Mësohet se ai ka përdorur një palë tuta për të kryer aktin tragjik.
Pak para ngjarjes, rreth orës 00:50, punonjësi i policisë kishte kryer një kontroll rutinë dhe i ndaluari nuk kishte shfaqur asnjë shqetësim apo sjellje të pazakontë. Megjithatë, në kontrollin e radhës, ai u gjet i varur në rrjetën e dritares së dhomës.
Menjëherë, efektivët ndërhynë për ta ndihmuar, ndërsa njëri prej tyre preu rrobën me të cilën ishte vetëvarur, por fatkeqësisht, i ndaluari kishte ndërruar jetë para mbërritjes së shërbimit mjekësor.
Greku, i cili ishte arrestuar për kryerjen e katër vjedhjeve të portofolave gjatë muajve shkurt dhe mars, kishte deklaruar më herët se ishte përdorues i lëndëve narkotike dhe ishte kontrolluar në shërbimin e toksikologjisë.
Autoritetet po vijojnë hetimet për të zbuluar më shumë detaje mbi këtë ngjarje tragjike.
