Një ngjarje e rëndë ka ndodhur në Sarandë ku bëhet me dije se një 33-vjeçar italian ka humbur jetën.
Pasditen e sotme shtetasi italian është paraqitur në spital, ku më pas ka ndërruar jetë. Dyshimet e para raportojnë se bëhet fjalë për arrest kardiak. Ndërkohë që grupi hetimor po punon për sqarimin e plotë të rrethanave të ngjarjes.
“Sarandë/Informacion paraprak
Sot, rreth orës 16:30, në spitalin e Sarandës, ka mbërritur për ndihmë mjekësore shtetasi italian D. N., 33 vjeç, i cili më pas ka ndërruar jetë në spital, dyshohet si pasojë e një arresti kardiak.
Grupi hetimor po punon për sqarimin e plotë të rrethanave të ngjarjes”, thuhet në njoftimin e policisë së shtetit.
Kujtojmë që ditën e djeshme një situatë e pazakontë e ka rikthyer kryebashkiakun e Sarandës, Adrian Gurma në profesionin e tij, atë të mjekut. Gjithçka ka ndodhur rreth orës 23.30 të ditës së djeshme në shëtitoren e Sarandës, ku një turiste italiane ka humbur ndjenjat duke rënë në tokë pasi nuk ishte ndjerë mirë.
Të afërm të saj dhe kalimtarë të rastit janë përpjekur që ta ndihmojnë duke i dhënë ndihmën e parë, ndërsa ka ndërhyrë edhe vetë Gurma, i cili ndodhej në shëtitore së bashku me stafin e tij për inspektim. Sipas bluzave të bardha të urgjencës në Sarandë, 57-vjeçarja italiane Tereza Zakarelo mori ndihmën mjekësore për gjendje lipotimie me luhatje te tensionit, takikardi dhe çrregullime të funksionit kardiak që i kishte ardhur nga qëndrimi i gjatë në diell gjatë ditës. Ajo qëndroi në urgjencë për rreth 4 orë dhe u largua në gjendje të normalizuar.
