Një ngjarje e rëndë ka ndodhur në Lezhë, ku një 9-vjeçar është plagosur rëndë me kapsollë. Mësohet se i mituri në fshatin Markatomaj ka pësuar dëmtime në fytyrë nga plasja e kapsollave dhe është marrë nga autoambulanca dhe po dërgohet në spitalin rajonal të Lezhës për ndihmë mjekësore.
Ende nuk dihen rrethanat e ngjarjes, ndërsa policia ka nisur hetimet.
“Lezhë / Informacion paraprak
Në fshatin Markatomaj, shtetasi i mitur M.M. 9 vjeç, duke luajtur, ka plasur një kapsolle dhe për pasojë ka marrë lëndime të lehta në fytyrë (skuqje).
Pas mjekimit të marrë në Spitalin Rajonal Lezhë, është larguar në banesë, jashtë rrezikut për jetën.
Grupi hetimor vazhdon veprimet verifikuese për sqarimin e plotë të rrethanave dhe për të identifikuar personin që ka tregtuar kapsollën”, bëhet e ditur në njoftimin e Policisë së Shtetit.
Në Tiranë janë vetëm dy subjekte të licensuara për shitjen e mjeteve piroteknike dhe sërish ky treg nuk kontrollohet.
Ligji e përcakton qartë se kush dhe kur duhen shitur këto artikujt piroteknike.
Në pikat 1, 2 dhe 3 të nenit 15 të ligjit 73 përcaktohet shitja me pakicë dhe përdorimi i tyre nga personat juridikë dhe tregtarë . Ata mund të shesin artikujt piroteknike si fishekzjarre dhe artikujt piroteknikë teatrale sipas kategorive të përcaktuara në nenin 5, i cili shpjegon llojin e lëndës plasëse. Kategoria F1 janë fishekzjarret që kanë për qëllim të përdoren brenda vendbanimeve, kategoria F2 fishekzjarrët që kanë për qëllim të përdoren jashtë në ambiente të izoluara, kategoria F3 fishekzjarrët të cilët kanë për qëllim të përdoren në ambiente të hapura dhe të mëdha. Kategoria P1 janë artikuj piroteknikë që nuk u përkasin kategorive të fishekzjarrëve ose artikujve piroteknikë teatralë dhe kategoria T1 artikuj piroteknikë për përdorim skenik që paraqesin rrezik të ulët.
Artikujt piroteknikë të kategorive F2 dhe F3 si fishekzjarre dhe kapsollë mund të shiten nga 15 dhjetori deri më 1 janar te qytetarët me moshë mbi 18 (tetëmbëdhjetë) vjeç. Ndërsa përdorimi i tyre lejohet për personat mbi 18 (tetëmbëdhjetë) vjeç vetëm gjatë periudhës 27 dhjetor deri më 1 janar.
Ndërsa neni 36 , pika 1 e këtij ligji thekson se nëse operatorët ekonomikë kryejnë kundërvajtje administrative gjobiten nga 200 deri në 500 000 (pesëqind mijë) lekë të rinj nëse angazhohet në tregtimin e artikujve piroteknikë pa marrë autorizimin përkatës.
Por që prej hyrjes së dhjetorit, në Tiranë dëgjohen plasjet e kapsollave dhe fishekzjarre pa fund. Për të mos përmendur edhe gjatë vitit hedhjen e fishekzjarreve në orën 00:00, kur qytetarë të ndryshëm festojnë ditëlindje apo festa të tjera me këto lëndë të ndaluara.
