Shumë emra të njohur të botës së krimit në Shqipëri, kanë arritur që t’i shpëtojnë burgut falë lojrave me drejtësinë.
I tillë është edhe rasi i Olger Mustafës në Korçë, ose i njohur ndryshe si “Ger Muçi”.
Ky i fundit ndodhet në burg, pasi akuzohet për vrasjen me dashje të Altin Balliut, shkruan “Shqiptarja.com”.
Vrasja është kryer në kohën kur Mustafa ishte me shërbimin e provës.
Mirëpo, ky person edhe pse ishte dënuar me 12 vite burgim në 2010-ën, për tentativë vrasje ndaj Marko Hysollit dhe ishte liruar me kusht, sërish nuk monitorohej nga shërbimi i provës.
Rezulton se Mustafa është liruar me kusht nga gjyqtarja e Korçës, Flojera Davidhi dhe nuk ëshë vënë asnjë ditë në kontroll nga shërbimi i provës.
Në mes të datës 14 dhe 15 maj, drejtuesja e Prokurorisë së Korçës, i dërgon një kërkesë drejtorit të Shërbimit të Provës, për t’i vënë në dispozicion një kopje të dosjes dhe praktikës, për të vendosurin në shërbim prove, për nevoja të hetimit.
Një ditë pas dërgimit të kërkesës, drejtori i Shërbimit të Provës, Kiço Koço i kthen përgjigje drejtueses së Prokurorisë, ku i thotë se personi në fjalë nuk është vënë në shërbim prove
Nisur nga kjo situatë, ka shumë gjasa që prokurori i ekzekutimeve të vendimeve penale, të mos e ketë çuar për ekzekutim në shërbimin e provës, vendimin e datës 30 nëntor 2017, që e detyronte Mustafën të qëndronte në shtëpi dhe të mbante kontakte me shërbimin e provës.
Në vendimin për lirimin e tij, thuhej se i burgosuri vuante nga hernia diskale.
Mirëpo me të dalë nga burgu, Mustafa jo vetëm që nuk ka qëndruar në shtëpi, por më 17 janar të 2019-ës, ka qëlluar me katër plumba, dy në kokë, një në gjoks dhe një në kofshë, të riun Altin Balliu.
Shkak për krimin u bë një zënkë për bllokimin e rrugës.
