Një ngjarje e rëndë ka tronditur qytetin e Romës këtë fundjavë. Dy trupa të pajetë, një grua dhe një vajzë rreth 6 muajshe, janë gjetur pasditen e së shtunës në parkun Villa Pamphili.
Skena makabre është zbuluar në dy vende të ndryshme të parkut, rreth 100 metra larg njëra-tjetrës.
Trupi i vajzës u zbulua fillimisht pranë një grumbulli mbeturinash nga dy gra që po kalonin aty pranë.
Fillimisht, ato menduan se ishte një kukull, por kur u afruan me ndihmën e një burri, kuptuan të vërtetën tronditëse. Vogëlushja ishte e zhveshur dhe me dëmtime në krah dhe këmbën e djathtë. Hetimet paraprake sugjerojnë se ajo ka ndërruar jetë pas gruas.
Më tej, një grup qytetarësh që po luanin volejboll në park panë një thes të zi në shkurre. Njëri nga ta, Giacinto Tito, 40 vjeç, punëtor me origjinë peruane, deklaroi se kur u afruan për të marrë topin, vunë re një krah dhe një këmbë që dilnin nga thesi. Ata njoftuan menjëherë policinë.
Gruaja ishte e veshur, por nuk kishte asnjë dokument identifikimi. Sipas prokurorit Antonio Verdi, në trupin e saj nuk janë konstatuar menjëherë shenja dhune, por pritet analiza e ADN-së dhe ekzaminimet mjekoligjore për të përcaktuar shkakun dhe kohën e vdekjes. “Është shumë herët për të nxjerrë përfundime,” tha ai për La Repubblica.
Ndërkohë, dëshmi të tjera të mbledhura nga policia flasin për një grua të re, në dukje evropiane, e cila është parë në një gjendje të hutuar në park rreth orës 18:40, dy orë pas zbulimit të trupit të vajzës.
Një grua 69-vjeçare, e cila po shëtiste qentë me vajzën e saj, përshkroi se ajo ndodhej mbi një urë në qendër të parkut, duke lëvizur kokën në mënyrë të çuditshme. “Ishte me fustan të errët, të lirshëm, dhe kishte flokë kafe të çelët. U përpoqëm ta shmangnim sepse ishim me kafshët tona.”
Hetimet janë në fazën fillestare dhe autoritetet italiane përpiqen të zbardhin këtë mister të dyfishtë.
Deri tani nuk është konfirmuar nëse viktimat janë nënë e bijë, as origjina e tyre. Prania e patrullave të shumta, njësisë së hetimeve shkencore, zjarrfikësve dhe prokurorit në vendngjarje tregon për seriozitetin e hetimit që tashmë ka marrë vëmendje të gjerë.
