Një ngjarje e rëndë ndodhi këtë të mërkurë në zonën turistike të njohur si “Gjiri i Filikur” në Himarë, ku një vajzë 23-vjeçare nga Holanda humbi jetën gjatë një aktiviteti me zbritje me litar nga një shkëmb.
Sipas policisë, gjatë zbritjes, shtetasja M.B. dyshohet të ketë humbur ekuilibrin dhe ra nga një lartësi e madhe. Megjithëse i është dhënë ndihma e parë dhe u transportua me ndihmën e Policisë Kufitare, plagët e rënda ishin fatale dhe ajo ndërroi jetë në vendngjarje.
Në të njëjtën kohë, si pasojë e rrëshqitjes së gurëve gjatë incidentit, një vajzë tjetër, 18-vjeçarja franceze J.L., që ndodhej pranë, u dëmtua dhe po trajtohet në spital jashtë rrezikut për jetën.
Forcat e rendit dhe grupi hetimor janë në vendngjarje, duke vijuar punën për të zbardhur shkaqet dhe rrethanat e aksidentit.
