Një ngjarje e rëndë ka ndodhur në Greqi, ku një fëmijë 12-vjeçar ka rënë në kontakt me energjinë elektrike dhe për pasojë ka humbur jetën.
12-vjeçari me origjinë shqiptare që jetonte me familjen në Tsilivi, Zakynthos ndërroi jetë tragjikisht mbrëmjen e të shtunës vonë, teksa ishte duke luajtur me shokët e tij.
Mësohet se i mituri humbi jetën pranë shtëpisë ku jetonte, gjatë një loje që po zhvillonte me bashkëmoshatarët e tij, ai u fsheh pas një kondicioneri të një hoteli që i mori jetën.
Sipas mediave vendase kondicionerët nuk ishin të ndezur, por njëri prej tyre kishte qenë i ngarkuar me energji elektrike dhe kur 12-vjeçari e preku, mbeti i vrarë në vend.
Në vendin e ngjarjes ka mbërritur menjëherë ambulanca, por pavarësisht përpjekjeve të saj, 12 vjeçari ndërroi jetë, duke sjell një pikëllim edhe tek ata që e panë ngjarjen nga afër dhe ishin banorë të zonës. Fëmija u transportua në Spitalin e Përgjithshëm të Zakynthos, pa puls. Të gjithë mjekët u munduan që ta sillnin në jetë, por fatkeqësisht nuk arritën të bënin asgjë. Po ashtu në vendngjarje ka mbërritur edhe policia e cila ka shoqëruara në komisariat pronarin e hotelit ku humbi jetën 12-vjeçari shqiptar, i cili jetonte në Greqi.
