Një ngjarje e rëndë ka ndodhur në Gjirokastër, ku një 20-vjeçare nga fshati Zhulat ka ndërruar jetë në orët e para të mëngjesit në maternitetin e qytetit.
Bëhet me dije se e reja shtatëzënë, Klea Muxhaj, është paraqitur në maternitetin e spitalit të Gjirokastrës rreth orës 03:30 të mëngjesit dhe me dhimbje të forta në bark për shkak se ishte në muajin e nëntë të shtatëzanisë.
Sipas familjarëve, vajza e tyre është futur në operacion dhe mjekët i kanë komunikuar lajmin se lindja e fëmijës kishte shkuar mirë dhe se nëna e foshnja gëzonin shëndet të plotë.
Pas këtij lajmi të gëzueshëm, familjarët kanë shkuar në shtëpi, ndërkohë që vetëm disa orë më vonë janë njoftuar se vajza e tyre kishte shfaqur komplikacione dhe ishte në gjendje të rëndë. Kur kanë shkuar në maternitetin e spitalit të Gjirokastrës, familjarët e Klea Muxhajt kanë marrë lajmin e kobshëm se 20 vjeçarja kishte ndërruar jetë.
Mjekët e maternitetit janë shprehur se foshnja ka qenë në një pozicion kryq në barkun e nënës dhe kjo i ka shkaktuar 29-vjeçares probleme e dhimbje. Për këtë rast po pritet dhe për ekspertizën mjeko-ligjore e cila do të nxjerrë saktë shkakun e vdekjes.
Sakaq, familjarët e 20-vjeçares Klea Muxhajt kanë akuzuar mjekët për neglizhencë. Ata janë shprehur se mjekët ia morën në qafë vajzën e tyre të vetme, duke theksuar se këtë çështje do ta ndjekin penalisht./GazetaReforma.com/
