Një incident i rëndë ka ndodhur në Astir pak minuta pas mesnatës, ku një ashensor është shkëputur dhe brenda tij kanë rezultuar të jenë disa persona.
Si pasojë e rënies së ashensorit, janë plagosur 2 gra, njëra prej tyre, shtetasja M.Q ka marrë mjekimin e duhur dhe është dërguar në banesën e saj. Ndërsa një tjetër shtetase ende e paidentifikuar, duket se ka dëmtime më serioze dhe ndodhet nën kujdesin e mjekëve.
Në momentin e incidentit, në ashensor kanë qenë 5 persona, tre djem dhe dy vajzave, një prej të cilave shtatzënë. Në lidhje me këtë ngjarje ka reaguar edhe policia, e cila njofton se pas marrjes së mjekimit një prej vajzave është larguar për në banesë, ndërsa tjetra ndodhet në spital nën kujdesin e mjekëve. Tashmë një grup hetimor po punon për të mësuar shkaqet e kësaj ngjarje.
Siç mësohet, janë shkëputur kavot e ashensorit, duke vënë në dukje mungesën e sigurisë nëpër pallatet e zonës së Astirit.
Pamje të reja kanë dalë nga incidenti i ndodhur në Astir ku një ashensor u shkëput dhe si pasojë shkaktoi plagosjen e dy grave, njëra prej të cilave ndodhet ende në spital nënë kujdesin e mjekëve.
Ndërsa shihet se pas incidentit, është rrethuar e gjithë zona dhe policia po bën verifikimet përkatëse për të gjetur shkakun e saktë të rënies së ashensorit.
Ky incident nxit që të merren masa më të rrepta përsa i përket kontrollit lidhur me sigurinë në ashensoret e pallateve jo vetëm në zonën e Astirit por në të gjithë Tiranën dhe Shqipërinë.
Njoftimi Zyrtar nga Policia:
Tiranë/Informacion paraprak
Më datë 12.09.2021, rreth orës 00:05, në Astir, dyshohet se në një pallat është shkëputur ashensori. Si pasojë është dëmtuar shtetasja M. Q, e cila pas marrjes së mjekimit, u largua për në banesë, dhe një shtetase tjetër, ende e paidentifikuar e cila ndodhet në spital, nën kujdesin e mjekëve.
Vijon puna nga grupi hetimor për sqarimin e rrethanave të ngjarjes.
