Pasditen e sotme një aksident i rëndë ka ndodhur në aksin rrugor Belsh-Kuçovë, afër fshatit Marinës ku për pasojë ka humbur jetën një 15-vjeçar.
Sipas të dhënave fillestare 15-vjeçari Orgito Musai po udhëtohte me motoçikletën e tij së bashku me një shokun e tij kur është përplasur nga një makinë e drejtuar nga 34-vjeçati T.N.
Musai ka humbur jetën në vend ndërsa pasagjeri në motoçikletën e tij është dërguar në spitalin rajonal të Elbasanit ku ndodhet nën kujdesin e mjekëve.
Njoftimi i policisë:
Rreth orës 14:30, shtetasi T. N., 34 vjeç, duke drejtuar një automjet, është përplasur me motomjetin me drejtues shtetasin O. M., 15 vjeç dhe pasagjer në motomjet shtetasin K. P., 15 vjeç, të dy banues në Belsh.
Si pasojë e aksidentit ka humbur jetën drejtuesi i motomjetit, Orgito Musai, ndërsa pasagjeri në motomjet, shtetasi K. P ., ndodhet në Spitalin Kirurgjik të Elbasanit, nën kujdesin e mjekëve.
Grupi hetimor ndodhet në vendngjarje dhe po punon për përcaktimin e shkaqeve të aksidentit.
Kujtojmë se aksidentet rrugore e këtij viti, kanë pësuar rënie me 11,5 për qind, krahasuar me të njëjtën periudhë të një viti më parë.
Referuar raportit të fundit të Institutit të Statistikave (INSTAT), numërohen 92 aksidente rrugore nga 104 aksidente të ndodhura në muajin prill të vitit 2021.
Ndërkohë, në katërmujorin e parë të vitit 2022, numërohen 377 aksidente rrugore nga 427 aksidente të ndodhura në të njëjtën periudhë të vitit të kaluar.
