Hetimet për rrëzimin tragjik të avionit të Air India, që shkaktoi vdekjen e 279 personave muajin e kaluar, janë përqendruar te veprimet e pilotëve në momentet e fundit të fluturimit.
Sipas burimeve të mediave ndërkombëtare, të njohura me vlerësimet fillestare të zyrtarëve amerikanë, nuk janë konstatuar deri tani probleme teknike me modelin Boeing 787 Dreamliner.
Sipas raportimit të Wall Street Journal, analizat paraprake sugjerojnë se çelësat që kontrollojnë rrjedhën e karburantit në të dy motorët e avionit rezultojnë të kenë qenë të fikur, megjithëse ende nuk është e qartë nëse kjo ka ndodhur aksidentalisht, me qëllim, apo gjatë një përpjekjeje për t’i rivendosur në funksion.
Këta çelësa janë thelbësorë për ndezjen dhe funksionimin e motorëve dhe zakonisht qëndrojnë të aktivizuar gjatë gjithë fluturimit.
Nëse vërtetohet se çelësat ishin të fikur, kjo mund të shpjegojë aktivizimin e turbinës emergjente të avionit (RAT – ram air turbine), e cila siguron energji në raste dështimi të plotë të motorëve.
Sipas burimeve, kjo turbinë u aktivizua vetëm pak çaste para se avioni të binte mbi një konvikt studentësh të mjekësisë.
Si ndodhi ngjarja?
Ngjarja ndodhi më 13 qershor, kur fluturimi AI171, me destinacion Londrën, u rrëzua vetëm pak minuta pas ngritjes nga aeroporti i Ahmedabadit, në shtetin indian të Gujarat-it. Avioni u përplas me një kompleks banimi pranë pistës, ku jetonin studentë të mjekësisë dhe familjarët e tyre. Përplasja shkaktoi shkatërrime të mëdha dhe zjarre masive në zonë.
Në bord ndodheshin 230 pasagjerë dhe 12 anëtarë ekuipazhi. Vetëm një person, një shtetas britanik me origjinë indiane, arriti të mbijetojë. Ai ndodhej në pjesën e përparme të avionit dhe u nxor i gjallë nga rrënojat, me plagë që po trajtohen në spital.
Trupat e 279 viktimave janë transportuar në spitalin e qytetit për identifikim, një proces që po zgjatet për shkak të dëmtimeve ekstreme dhe nevojës për analiza ADN-je. Ministri i Brendshëm i Indisë ka konfirmuar se raporti përfundimtar nuk do të publikohet përpara përfundimit të këtyre analizave.
Ndërkohë, vetëm disa orë pas aksidentit, një tjetër fluturim i Air India u detyrua të bëjë ulje emergjente në Tajlandë për shkak të një alarmi për bombë. Pasagjerët u evakuuan në siguri, por ngjarja shtoi shqetësimet rreth sigurisë së linjës ajrore.
Ky aksident është konsideruar si një ndër më të rëndët e dekadës dhe ka rikthyer vëmendjen ndërkombëtare te sfidat e sigurisë ajrore.Hetimet janë në vijim dhe priten të hedhin dritë mbi shkaqet e vërteta të kësaj tragjedie që tronditi Indinë dhe industrinë globale të aviacionit.
