Kreu i Partisë Demokratike ka pritur ditën e sotme në një takim kreun e Lëvizjes Vetëvendosje, Albin Kurti. Lulzim Basha ka bërë të ditura detaje nga takimi në një psotim ku shkruan se e ka uruar Kurtin për fitoren dhe modelin për organizimin e zgjedhjeve. Basha ndër të tjera shkruan se bashkë me Kurtin kanë biseduar për sfidat që ka përpara Shqipëria dhe Kosova dhe ai i ka garantuar kreut të LVV se si kryeministër do të bëjë gjizthçka për të forcuar bashkëpunimin mes dy vendeve.
Postimi i Bashës:
Prita sot me kënaqësi liderin e Lëvizjes Vetëvendosje, kryeministrin në ardhje të Kosovës Albin Kurti. E urova për fitoren e zgjedhjeve parlamentare dhe modelin që Kosova i dha Shqipërisë dhe gjithë rajonit për mënyrën e organizimit të zgjedhjeve edhe pse në kushte pandemie.
Biseduam për sfidat që ka përpara Shqipëria dhe Kosova. Nënvizova gjatë takimit me zotin Kurti nevojën jetike që ka Shqipëria për ndryshim në zgjedhjet e 25 prillit dhe e garantova se nesër si kryeministër i Shqipërisë do të bëj gjithçka për të rritur dhe forcuar bashkëpunimin me Kosovën në funksion të zhvillimit ekonomik, punësimit, njohjes së saj nga vende që ende se kanë bërë si dhe anëtarësimit në institucionet ndërkombëtare.
Më herët lideri i Vetëvendosjes është takuar edhe me presidentin Ilir Meta, ndërsa pritet të mbajë një takim edhe me kryeministrin Rama. Ai ndodhet në Shqipëri në kuadër të një vizite tre-ditore që nisi dje me një vizitë në lezhë për 577 vjetorin e Lidhjes së Lezhës.
