Instituti i Shëndetit Publik nuk është në gjendje të identifikojë rastet e variantet e reja të COVID-19 që tashmë po përhapen në të gjithë botën. Kjo vjen si pasojë e mungesës së mjeteve dhe njohurive të nevojshme. Këtë gjë e ka pranuar edhe ministrja e Shëndetësisë, Ogerta Manastirliu.
Në një konferencë gjatë ditës së sotme, misnitrja ka thënë se stafi i Institutit të Shëndetit Publik po trajnohet dhe po punon me ekspertë turq. Ndërkohë, ajo bëri me dije se ditën e nesërme do të vijnë edhe kitet e nevojshme nga Turqia për identifikimin e rasteve me mutacionin e ri të COVID.
Ka qenë vetë ministrja që një ditë më parë së bashku me kryeministrin Rama thanë se ka sinjale të arsyeshme se në vendin tonë mund të kenë hyrë variantet e reja të virusit. Ndër të tjera u bë me dije se mostrat që dyshohen janë në laboratorët e referencës në Gjermani nga ku pritet konfirmimi.
Shqipëria është në pikun e rasteve me koronavirus pasi gjatë ditës së sotme është arritur rekordi, duke u regjistruar 1239 infektime. Numri i viktimave ishte 16. Ndërkohë, javën e fundit numri i rasteve ka qenë mbi 1 mijë, me përjashtim të ditës së djeshme ku ra në 953.
