Qeveria spanjolle të martën miratoi faljet për nëntë udhëheqës separatist katalanas të burgosur për rolin e tyre në një përpjekje të dështuar për pavarësi në rajon në vitin 2017. Lajmin e bën të ditur transmetuesi shtetëror TVE pas përfundimit të një takimi të kabinetit. Hapi i radhës ishte paralajmëruar ditën e djeshme nga kryeministri spanjoll, Pedro Sanchez.
Udhëheqësit u dënuan në vitin 2019 me ndërmjet nëntë dhe 13 vjet për krime të kryengritjes dhe keqpërdorimit të fondeve publike, të kryera në organizimin e një referendumi për shkëputjen nga Spanja që autoritetet në Madrid e ndaluan, por që çoi në një deklaratë të pavarësisë që nuk zgjati shumë.
Kryeministri Pedro Sanchez i ka përshkruar faljet, të cilat sondazhet tregojnë se një shumicë e spanjollëve i kundërshtojnë, si një gjest i vullnetit të mirë dhe një hap i parë drejt zgjidhjes së një konflikti të hidhur politik me rajonin e pasur të verilindjes, qeveria e të cilit ka kërkuar një referendum të ri për pavarësinë nën kujdestarinë e Madridit.
Partitë konservatore të opozitës në Madrid kanë thënë se ata do të sfidojnë faljet në gjykata, ndërsa qindra separatistë protestuan të hënën në Barcelonë, duke e konsideruar planin e Sanchez të pamjaftueshëm dhe duke kërkuar një referendum të ri mbi pavarësinë e rajonit.
