Prej javësh Italia po kalon një situatë tepër të vështirë, pasi koronavirusi është treguar i pamëshirshëm duke vrarë mijëra njerëz, teksa javën e fundit kurba ka qenë e paqëndrushme.
Gjatë 24 orëve të fundit janë shënuar 570 viktima, duke pësuar një ulje të ndjeshme, nga 610 që u shënuan dje.
Po ashtu, është ulur edhe numri i rasteve të reja, pasi janë regjistruar 3,951 persona të infektuar, ndërsa dje shifra ishte 4, 204 persona.
Sipas të dhënave të publikuara nga emergjencat civile italiane, 1,985 pacientë janë shëruar në 24 orët e fundit, teksa shteti italian ka shënuar gjithashtu edhe një rekord të tamponeve, mbi 53 mijë brenda një dite.
Kështu, numri i të vdekurve në total është 18,849, ndërsa numri i të infektuarve 147, 577.
Mes viktimave 109 janë persona të stafit shëndetësor, teksa mijëra të tjerë janë infektuar.
Në fillim të kësaj jave, qeveria italiane njoftoi ndryshimin e strategjisë për luftën ndaj COVID-19, duke miratuar një plan me 5 pika:
- Distancim social,
- mjete mbrojtëse për të gjithë spitale COVID në të gjithë territorin kombëtar,
- përforcim i rrjeteve shëndetësore lokale,
- studim për të kuptuar sa janë prekur dhe
- një aplikacion, si modeli i Koresë së Jugut, për të verifikuar kontaktet e personave të infektuar.
