Ditën e sotme, në media u raportua se prokurorja e Apelit në Shkodër, Besa Nikëhasani i është drejtuar Gjykatës Ndërkombëtare të të Drejtave të Njeriut në Strasburg për të kërkuaj drejtësi, pasi u shkarkua nga detyra gjatë procesit të Vettingut.
Sipas vendimit të Komisionit të Pavarur të Kualifikimit, në prill të 2018-ës, Nikëhasani nuk justifikonte pasurinë e saj, konkretisht dy apartamente, një në Lezhë dhe një në Tiranë, dy garazhe si dhe një fuoristradë Toyota Land Cruiser me vlerë 20 mijë euro.
Ndonëse në ILDKPI deklarimet e saj kanë rezultuar të sakta dhe burimet e pasurisë janë cilësuar të ligjshme, një hetim i pavarur i KPK-së e ka gjetur në shkelje prokuroren.
Megjithatë, asokohe Besa Nikëhasani, e cila kishte zgjedhur të mbrohej vetë pa pasur një avokat, i mohoi pretendimet e komisionit të përbërë nga Suela Zhegu, Genta Tafa (Bungo) dhe Pamela Qirko.
“Për dy garazhet nuk i kam fshehur por i kam deklaruar në vitin 2009. Është një lapsus por vlera 90 mije euro është për banesën dhe 2 garazhet. I bleva garazhet por se dija sa m2 do ishte. Noteri ka bërë një lapsus për një marrëveshje përfitimi që ne kishim brenda familjes nga shitja e një toke. Njëherë ma ka bërë vjehrra deklaratën e pasurisë. Nuk kemi pasur certifikatë pronësie për apartamentin e vjetër në Lezhë prej 130 m2. Ka qenë me leje ndërtimi që nga 2004. Kemi blerë makinë të shtrenjtë për sigurinë time pasi dy herë na kanë përplasur me makinë. Andrea Markut i kemi borxhe, ky person ka “Exchange”.
Ai na ka ndihmuar. Ajo nuk është makinë luksi. Nuk kemi pas qellim të fshehim pasurinë. Në 20 vite dy herë kam shkuar me pushime. Jam e hapur për cdo pyetje. Kemi harruar të deklarojmë shitjen e një makine Golf 3. Por e ka deklaruar pastaj burri. Në 2003 na kanë vënë tritol tek makina. Kërkoj të konfirmohem në detyrën time duke i qëndruar shpjegimeve që bëra për pasuri të justifikuar për burime të ligjshme.”-është shprehur Nikëhasani në argumentin e saj mbrojtës.
Megjithatë, pretendimet e saj nuk u morën parasysh dhe ajo u shkarkua nga detyra. Por ndërkohë që ajo kërkon të drejtën e saj në Strasburg, kolegu i saj në sistemin e drejtësisë, anëtari i Gjykatës së Lartë Ardian Dvorani, ndonëse është kapur me të njëjta shkelje gjatë procesit të Vettingut, vijon i pashqetësuar aktivitetin e tij si kryetar i Këshillit të Emërimeve në Drejtësi.
Ashtu si Nikëhasani, Dvorani rezultonte i rregullt nga deklarimet e tij periodike, por ILDKPI nxorri si të pajustifikuar një shumë prej 10 milionë lekësh që nuk ishte përfshirë në deklaratën e pasurisë gjatë procesit të Vettingut.
Megjithatë, KPK ndërmori një hetim të pavarur nga ku rezultoi se Dvorani, një “peshë e rëndë” në sistemin e drejtësisë në Shqipëri, nuk kishte si qëllim fshehjen e pasurisë, por çështja e 10 milionë lekëve ishte thjesht një pasaktësi apo “harresë”, duke u justifikuar fare thjeshtë me deklarimet e tij të sakta periodike.
Nga ana tjetër nuk është parë si problematik as fakti se Dvorani ishte i punësuar si pedagog në disa universitete private, çka do të sillte një konflit papajtueshmërie në rast se çdonjëri prej universiteteve do të përfshihej në një proces gjyqësor.
Gjithashtu, KPK arriti në përfundimin se gjyqtari nuk kishte kontakte me persona të papërshtatshëm, ndonëse ka të dhëna të forta dhe akuza nga ana e opozitës se Dvorani është mik familjeje me ish-ministrin e Brendshëm Fatmir Xhafaj dhe ka pasur kontakt me vëllanë e tij, Agron Xhafaj, i cili sot vuan dënimin në Itali për trafik droge.
Por me gjithë këta “flamuj të kuq”, Dvorani jo vetëm që e kaloi Vettingun, por si kryetar i Komisionit të Emërimeve në Drejtësi, post që sigurisht do të duhej të mbahej nga një figurë e kulluar përsa i përket problematkave të tilla, tashmë pret dhe të deleguarit e Bashkimit Europian si ambasadori Luigi Soreca, i cili për ironi, shprehet përkrah Dvoranit se pret që institucionet e reja të drejtësisë të funksionojnë siç duhet. /gazetarefoma.com
