Pak javë më parë në zonën e Porcelanit, ish-efektivi i policisë, Santiago Malko u ekzekutua me breshëri kallashnikovi.
Në pamjet e siguruara nga “ABC News”, shihet se autorët e kanë ndjekur Malkon nga një distancë shumë e afërt.
Ish-polici është duke lëvizur me mjetin e tij “BMW X5”, ndërsa vetëm 4 sekonda pas tij ndodhet “Volkswageni” i bashkëpunëtorëve dhe “Mercedesi Benz CLS” nga i cili dolën edhe plumbat.
Ish-polici ndalon në një zonë të ndriçuar pranë një lavazhi, ndërsa ul edhe shpejtësinë pasi po fliste në telefon.
Ai nuk e vuri re që po ndiqej nga dy automjetet njëkohësisht, deri në momentin që atentatorët e kanë qëlluar me breshëri plumbash.
Më pas një person zbret nga “Mercedesi” dhe hipën në automjetin tip “Golf”.
Të shtënat kanë krijuar panik te qytetarët, të cilët hynë me vrap të frikësuar në lokalet e zonës.
Hetuesit dyshojnë se ekzekutimi i Malko ka ndodhur 100 metra përpara vendit të parashikuar, ku nuk kishte kamera sigurie dhe vendi ishte i pandriçuar.
Kjo për shkak se atentatorët dyshuan se Malko do të qëndronte te lavazhi.
Ndërkohë pak minuta më vonë në fshatin Ferraj, u gjet i djegur “Mercedesi” i përdorur për ekzekutimin e ish-policit.
Në lidhje me këtë ngjarje është arrestuar vetëm Blendi Teta, i cili dyshohet se ka informuar autorët për lëvizjet e Malkos, ndërsa 4 të tjerë janë shpallur në kërkim.
