Prokuroria e Përgjithshme ka nisur punën për verifikimin e listës së emrave kandidatë për ministra. Ajo ka nisur kërkesë për informacion tek të gjitha organet e hetimit në vend, në mënyrë që të marrë të dhëna për secilin nga ministrat.
Diçka të tillë e ka konfirmuar edhe kreu i SPAK, Arben Kraja dhe ka thënë se në institucionin që ai drejton, ka ardhur shkresa dhe kanë nisur verifikimet për disa nga emrat e propozuar për ministra. Kjo çështje do të ketë përparësi për shkak të afatit 7 ditor. Për verifikimet e kryera, do të jepet informacion zyrtar aq sa e lejon ligji.
Kujtojmë që presidenti Ilir Meta bëri kërkesë ditën e djeshme lidhur me proceset hetimore apo penale që janë nisur apo mund të nisen për secilin nga ministrat e propozuar.
“Presidenti Ilir Meta kërkon të informohet nëse dispononi të dhëna apo informacione mbi emrat e kandidatëve të propozuar, lidhur me procese hetimore apo penale, që janë nisur apo mund të jenë në fazë vlerësimi për t’u iniciuar për secilin prej tyre.
Nëse për këta shtetas disponohen informacione të kësaj natyre, pa cenuar sekretin hetimor kërkojmë që të informohemi mbi gjendjen e procedimit dhe statusin e secilit prej shtetasve të mësipërm.
Lutemi që ky informacion të na përcillet brenda një kohe sa më të shpejtë. Pasi sikur ju e dini, Presidenti duhet të shprehet mbi këto emërime brenda 7 ditëve nga administrimi i propozimit prej kryeministrit”, shkruhej në letrën e Metës drejtuar Prokurorisë së Përgjithshme.
