Ish-ministri i mjedisit Lefter Koka para një jave u arrestua me urdhër të SPAK për aferën e inceneratorëve ku mbi të rëndojnë akuzat e shpërdorimit të detyrës, pastrimit të parave dhe korrupsionit.
Pas Apelimit të vendimit të shkallës së parë nga Koka për masë sigurie më të butë, Gjykata e Apelit ka caktuar edhe datën kur do zhvillohet seanca për caktimin e masës së sigurisë ndaj tij.
Ish-ministri i Mjedisit do të dalë përballë gjykatës më datë 2 janar të vitit të ardhshëm.
Pak ditë më parë Gjykata e Posaçme la në burg ish-ministrin Koka, i cili u arrestua më 14 dhjetor për aferën korruptive të inceneratorëve.
Pak për karrierën politike të Lefter Kokës:
Lefter Koka u përfshi në politikë në vitin 2000 si anëtar i Këshillit Bashkiak të Durrësit, pas angazhimit në sektorin privat. Në vitet 2003-2007, Lefter Koka ka shërbyer si kryetar i Bashkisë së Durrësit, ndërsa në vitin 2009 u bë deputet i Kuvendit të Shqipërisë nën siglën e Lëvizjes Socialiste për Integrim. Ai u zgjodh ministër i Mjedisit në kabinetin e kryeministrit Edi Rama pas zgjedhjeve parlamentare të vitit 2013, si pjesë e Lëvizjes Socialiste për Integrim, por u largua nga funksioni pas një mandati të plotë në vitin 2017, si pasojë e prishjes së koalicionit PS-LSI.
Ndryshe nga shumica e deputetëve të opozitës, Lefter Koka nuk pranoi ta djegë mandatin e deputetit në shkurt 2019, ndërsa në nëntor 2020 ai iu bashkua Partisë Socialiste. Më 1 shtator të këtij viti, edhe pse i zgjedhur si deputet nga votat e qytetarëve të Durrësit nga zgjedhjet parlamentare të 25 prillit, Koka vendosi të japë dorëheqjen nga mandati.
