Shiriti i kapitenit që Cristiano Ronaldo hodhi në fushë në ndeshjen Serbi-Portugali në 27 mars në Beograd, i indinjuar në shenjë proteste ndaj vendimit të gjyqtarit për të mos i akorduar gol një rast të minutave të fundit. Nëse do të ishte quajtur gol rasti i pretenduar, atëherë Portugalia do ta kishte fituar ndeshjen 3-2.
Megjithatë shiriti i portugezit mund të kthehet në një moment shprese për një fëmijë gjashtëmuajsh. Disa ditë më parë shiriti u vendos për ankand, ndërsa ditën e sotme është shitur për 64 mijë euro. Të ardhurat do të përdoren për të siguruar kujdes mjekësor për një fëmijë gjashtë muajsh që vuan nga atrofia muskulore kurrizore dhe që ka nevojë për ndihmë mjekësore jashtë vendit.
“Ankandi humanitar për shiritin e Cristiano Ronaldos sapo ka përfunduar për shifrën prej 7.5 milion dinarë…” njoftoi në Twitter Jovan Simic, themeluesi i organizatës.
Simic veçanërisht falënderoi zjarrfikësin Djordje Vukicevic për marrjen e shiritit të kapitenit në stadium pas ndeshjes dhe e ofroi për organizatën humanitare për të mbledhur para për operacionin e djaloshit.
Mbetet një fenomen i habitshëm se si sendet e futbollistëve të njohur në planet marrin shuma kaq të mëdha. Kujtojmë që vite më parë, u shit një copë bari e fushës për plot 40 mijë euro, thjesht dhe vetëm për faktin se e hodhi Cristiano Ronaldo.
