Teksa e gjithë vëmendja është përqëndruar në një reality show si “Big Brother Vip Albania”, një dramë e vërtetë po ndodh shumë afër kryeytetit.
Banorët e Bërxullës sërish ditën e sotme kanë dalë në protestë dhe kanë tentuar të blllokojnë rrugën e Rinasit.
Të dëshpëruar ata shprehen se shteti i ka shitur, dhe ky projekt i aksit rrugor Thumanë-Kashar nga “Gener 2”, që i merr pronat do t’i izolojë edhe si fshat. Pas përplasjes me efektivët, ata u tërhoqën sërish në rrugën dytësore. Ndërkohë që policia tentoi të shoqërojë një nga prej tyre, por banorët janë bërë bashkë duke mos e lejuar.
“Pronat do ti mbrojmë me gjak”, “Shteti na ka shitur”, “Shteti palë me krimin”, “Mbrojmë pronat tona”, ishin disa nga thirrjet e banorëve të Bërxullës. Gjithashtu një prej banorëve u shpreh se Parlamenti nuk duhet të kishte mbyllur punimet për ish-agjentin e FBI-së por duhet të kishte vijuar dhe të merret me problemet e qytetarëve.
“Tubimi jonë është paqësor, ka ndodh një problem me agjentin e FBI, bllokohet parlamenti. Ai është për hallet tona jo për ato të SHBA. Rama nëse ka bërë gjë, të shkojë si i pandehur, kolltukun nuk e ka gjithmonë pas vetes. Halli jon është ky, se janë 97 kryefamiljarë, merren tokë dhe pushtetarët bëjnë sikur janë të vdekur, nuk shohin”, deklaroi një prej banorëve.
Kujtojmë që kërkesa kryesore e banorëve që prej nëntorit të 2022, kur nisën kundërshtitë për investimin e ri, është vlerësimi i pronës me çmimin e tregut. Banorët thonë se vlera e çmimit të tregut fillon me 50 euro metri katror, jo rreth 500 lekë të vjetra.
