Një 30-vjeçar me origjinë shqiptare është arrestuar nga policia spanjolle në Barcelonë pasi akuzohej për një sërë vjedhjesh në Itali.
Mediat italiane raportojnë se pas muajsh hetimesh, rikonstruksionesh dhe kërkimesh, u arrestua një nga anëtarët e grupit që më 2 dhjetor të vitit të kaluar kryen një grabitje në Via San Donà dhe më pas u arratisën me një Alfa Romeo Giulietta pasi panë policinë. Gjatë arratisjes ata shkaktuan një aksident dhe u larguan në këmbë.
Për muaj të tërë, autoritetet italiane ishin në kërkim të autorëve. Por vetëm të mërkurën e kaluar u arrestua në Barcelonë, 30-vjeçari me origjinë shqiptare, Zef Bani.
Hetimet zbuluan se banda kriminale ishte e përbërë jo vetëm nga personi i arrestuar në dhjetor, Segi Gega, por edhe nga katër shtetas të tjerë shqiptarë. Ata ishin të specializuar për vjedhje banesash në të gjithë Italinë qendrore-veriore dhe, sipas hetuesve, përbëhej nga Zef Bani, V.T., 30 vjeç, P.S., 26 vjeç dhe M.D., 25 vjeç. Nga hetimet rezultoi se ata ishin veçanërisht të zgjuar dhe të kujdesshëm si në komunikimin ashtu edhe në udhëtimet e tyre, duke përdorur karta SIM telefonike të regjistruara për persona inekzistent dhe duke mos marrë me vete celularët e tyre gjatë vjedhjeve.
Por pas grabitjeve, shqiptarët shmangnin hipjen në fluturime direkte drejt Shqipërisë për të mbërritur në Itali, pasi i nënshtroheshin kontrollit kufitar dhe regjistrimit të të dhënave të pasagjerëve. Ata kalonin nëpër Spanjë ose Hungari dhe disa nga anëtarët e grupit kishin ndryshuar mbiemrin, pasaportën dhe përdornin pseudonime të ndryshme ose kishin dhënë të dhëna të ndryshme personale.
Nga hetimet u zbulua se grupi frekuentonte edhe Spanjën dhe në veçanti Barcelonën. 30-vjeçari Zef Bani u arrestua falë gruas së tij. Hetuesit monitoruan lëvizjet e saj dhe zbuluan se ajo ishte gati të arrinte në Barcelonë. Policia monitoroi lëvizjet e saj deri në qytetin bregdetar të Camarruga ku shqiptari po priste gruan dhe më pas e arrestuan menjëherë.
