Disa ditë më parë trupi i shqiptarit Festim Lato u gjet i pajetë në kanalin e Amsterdam-Rhein pranë Nigtevechtit, nga një kalimtar.
Mësohet se trupi i Latos do të mbërrijë në Shqipëri ditën e nesërme, pasi autoritetet holandeze kanë përfunduar të gjitha procedurat e nevojshme për tërheqjen e trupit të viktimës. Lato e kishte lënë amanet që kur të vdiste, trupi i tij të prehej në vendlindjen e tij.
Festim Lato u ekzekutua në Holandë nga persona ende të panjohur.
Presidenti i vetëshpallur i republikës së Çamërisë, jetonte prej 25 vitesh në Holandë. Ai ishte një ndër aktivistët më në zë për çështjen çame.
Sipas medias “De Gelderlander”, Lato ishte kreditor për një kohë të gjatë dhe ishte deklaruar nga gjykata në Zutphen i falimentuar. Lato ishte dënuar disa herë për mashtrim, kjo pas disa denoncimeve nga shumë persona. Edhe në Kosovë madje ishte akuzuar disa herë për mashtrim për disa mijëra euro.
Edhe mediat holandeze shkruajnë se ai kishte marrë borxh shuma të mëdha parash që nuk kishte mundur dot t’i shlyente.
Në shkrimin e publikuar thuhet se Lato ishte i përfshirë në punëra të dyshimta. Këtë e ka shprehur diplomati holandez Jeroen Zandberg i UNPO. Kjo e fundit është një organizatë e bazuar në Hagë për vendet, rajonet dhe popujt e papërfaqësuar.
“Ai solli shumë para në të holla përtej kufirit me Shqipërinë”, thotë diplomati Jeroen Zandberg.
