Babai i Ervis Martinajt, Mustafa Martinaj, është paraqitur në GJKKO për të dëshmuar në procesin për pronat e të birit dhe personave të lidhur me të, ndërsa seanca nuk u zhvillua për shkak të mungesës së dy prokurorëve.
Në fokus të deklaratës së tij ishte fati i të birit, i zhdukur prej më shumë se tre vitesh. Mustafa Martinaj u shpreh se për të nuk ka asnjë dyshim për atë që ka ndodhur, duke akuzuar indirekt institucionet për mungesë veprimi.
“Djali im është ekzekutuar në Durrës, si nga e di?! Jam babai pra! Dhe për këtë çështje kam dhënë shpjegime para Byrosë Kombëtare të Hetimit ku jam paraqitur me iniciativën time, kam ardhur vetë 2 muaj pas ngjarjes. Këta nuk duan ta hetojnë dhe ia kanë lënë Kurbinit”.
I pyetur për hetimet, ai u shpreh se nuk pret më asgjë nga autoritetet dhe se nuk ka mundësi as për hakmarrje.
“Nuk kam për çfarë të interesohem. Nuk kam fuqi as për hakmarrje. Kam ardhur se më ka thirrur gjykata, jam invalid, kam bërë disa ndërhyrje shëndetësore. Këta merren me vogëlsira dhe nuk merren me gjëra madhore”.
