Tashmë është marrë vendimi, duke duke nisur nga data 3 prill, e diela e parë e çdo muaji do të jetë dita pa makina në të gjitha qytetet kryesore të vendit.
Vendimi u bë i ditur nga ministrja Mirela Kumbaro përmes një komunikimi në Facebook.
Kumbaro u shpreh se dita pa makina do të shtrihet në qytetet kryesore të 12 qarqeve të vendit dhe është një thirrje për veprim, kursim dhe mjedis më të pastër.
“Nga data 3 prill, e diela e parë e çdo muaji do të jetë si fillim ditë pa makina në qytetet kryesore të çdo qarku. Nëse s’e fikim dot automjetin gjatë gjithë kohës, të paktën ta bëjmë ditëve të pushimit dhe të përdorim biçikletën a ecjen në këmbë. Fillojmë menjëherë në koordinim me bashkitë këtë plan kombëtar për kursim, për mjedisin dhe për shëndetin e të gjithëve”, tha ministrja.
Ndërkohë, përmes një komunikimi publik ministrja e Turizmit dhe Mjedisit, Mirela Kumbaro njoftoi hartimin e një plani kombëtar të ditëve pa makina, që do të shtrihet në qytetet kryesore të çdo qarku.
Kumbaro tha se në kushtet e një krize energjetike dhe karburanti, por edhe si përgjigje ndaj angazhimeve mjedisore të Shqipërisë, është një nismë e parë për të reduktuar lëvizjen me makina në ditët e pushimit.
“Krizën energjetike, si një kronikë të paralajmëruar jo shumë kohë më parë, fatkeqësisht po e ndjejmë pa dallim. Ngjarjet e fundit kanë vënë në vështirësi të gjitha ekonomitë globale dhe xhepat e çdo familjeje, sigurisht që pasojat po ndihen edhe në vendin tonë. Reagimi ka qenë i shpejtë, ku qeveria me ngritjen e Bordit të Transparencës po luan rolin vendimtar në shmangien e abuzimit me çmimin e karburanteve dhe të produkteve të shportës, me qëllim mbrojtjen e çdo qytetari. Angazhim ky që do të vazhdojë pa reshtur, por nga ana tjetër sa i takon krizës së karburanteve kërkon mirëkuptimin e tonë në reduktimin e lëvizjeve me automjete sa më shumë të kemi mundësi. Dhe nëse s’mund ta shmangim ndezjen e makinës çdo ditë, të paktën ta fillojmë nga ditët e pushimit. Prandaj e nisim planin e Ditës pa Makina nga e diela e parë e çdo muaji, duke filluar prej datës 3 prill”, tha Kumbaro.
Theksojmë se përtej argumenteve të dhëna nga figurat e qeverisë në lidhje me rëndësinë e “Ditës pa makina”, qytetarët mbeten të shqetësuar.
Shqetësimi dhe revolta është shprehur në rrjete sociale, duke thënë se ditëne dielë e shikojnë si opsion për të lëvizur jashtë qytetit, ndërkohë që gjithë javës janë në punë.
