Në një intervistë për Syri TV, kreu i Partisë së Lirisë, Ilir Meta, ka tronditur opinionin publik me lajmin e dorëzimit të dokumenteve për divorc me bashkëshorten e tij, Monika Kryemadhi. Meta bëri të ditur këtë vendim të rëndësishëm në përgjigje të deklaratave të Kryemadhit lidhur me SPAK.
Gazetari Çim Peka e pyeti Metën se si mund të bindë anëtarësinë dhe publikun se SPAK është i kapur nga Rama, kur nuk arrin të bindë dot bashkëshorten e tij. Në përgjigje, Meta theksoi se për shkak të deklaratave të Kryemadhit, ajo është tani ish-bashkëshortja e tij.
Meta deklaroi: “Keni shumë të drejtë. Pas kësaj deklarate, zonja Kryemadhi është ish-bashkëshortja ime. Dhe sot kam ndjekur edhe rrugën juridike për këtë çështje dhe kam njoftuar edhe djalin tim, Besar Ilir Meta, i cili më ka thënë pak kohë më parë që kur kemi kaq shumë tensione dhe probleme me njëri-tjetrin mund të gjeni ndonjë zgjidhje më të qetë dhe unë besoj se e kam gjetur një zgjidhje.”
Kujtojmë se Meta dhe Kryemadhi janë thirrur në SPAK disa herë kohët e fundit dhe ndaj tyre po kryhet edhe hetim pasuror. Madje autoritetet shqiptare kanë dërguar letërporosi në Britaninë e Madhe në lidhje me shkollimin e fëmijëve të tyre. Gjithashtu Meta ka nevojë të rivendosë besimin tek publiku në një kohë që po afrojnë zgjedhjet.
Ndoshta nuk është e kaq bardh e zi dhe diçka fshihet pas këtij divorci./GazetaReforma
