Mbrojtësi kuqezi, Elseid Hysaj duket se nuk do të mund të firmos përsëri me ekipin italian të Napolit. Sipas mediave italiane, drejtuesit e napolitanëve kanë nisur kërkimet për zëvendësuesin e tij që mesa duket nuk do vonojë shumë. Në fund të sezonit dhe në përfundim të kontratës Napoli u përpoq të binde anësorin kuqezi por oferta e fundit, për një kontratë 5-vjeçare nga ku do të përfitonte 2,5 milion euro, nuk u pranua nga Hysaj dhe agjenti i tij. Napoli nuk mund të shkoj përtej kësaj oferte dhe këtë e ka të qartë edhe vetë Hysaj i cili ka nisur të vlerësojë ofertat që vijnë në drejtimit të tij.
Mësohet se edhe ekipe të tjera nga Seria A si Juventus e Roma janë të interesuara për mbrojtësin shqiptar. Por jo vetëm kaq pasi sipas “L’Equipe”, në garë për të siguruar shërbimet e Hysaj është futur edhe Marseja. Klubi francez ka nisur negociatat me përfaqësuesit e tij për të gjetur një akord paraprak që do të bënte të mundur kalimin e tij në Ligue 1 në fund të këtij sezoni.
Ndërkohë kujtojmë se me ekipin e Marsejës është aktivizuar dhe kapiteni legjendar i Kombëtares, Lorik Cana, i cili ka qenë lider te francezët. Transferimi i Hysajt te Marseja mund të ishte një mundësi ideale për shqiptari, duke qenë se aktivizimi te Napoli kohët e fundit ka qenë shumë i pakët.
