Detaje të reja janë mësuar në lidhje me 43-vjeçarin nga Kavaja, i cili ndërroi jetë për shkak të COVID-19.
Sipas “Dosja.al”, para se t’i merrej tamponi, 43-vjeçari kishte shkuar të berberi për t’u qethur dhe dyshohet se ka infektuar edhe këtë të fundit.
Berberi ka shfaqur temperaturë prej 3 ditësh dhe nuk dihet nëse i është marrë tamponi, ndërsa javës së shkuar, ka pasur kontakt me dhjetëra klientë.
Mësohet se viktima ishte pronar i një hoteli.
Gjendja e tij shëndetësore u rëndua gjatë mbrëmjes së djeshme dhe iu vendos menjëherë respiratori.
Ai nuk vuante nga asnjë sëmundje shoqëruese, përveç obezitetit.
Gjatë orëve të fundit ndërroi jetë edhe një 71-vjeçar nga Kuçova, i cili vuante nga kanceri në mushkri.
Bilanci i COVID-19 në vendin tonë është 89 të prekur, mes të cilëve 4 viktima dhe një i shëruar.
Tek spitali Infektiv ndodhen 43 persona, 3 prej të cilëve mbahen në terapi intensive.
Me rastet e reja të identifikuara, harta e koronavirusit në vendit tonë është zgjeruar edhe me Korçën e Kuçovën.
