Policia ka arrestuar dje shtetasin,Blendi Teta, në kuadër të hetimeve për vrasjen e ish-policit, Santiago Malko.
Teta është kapur nga kamerat e sigurisë në vendin e krimit, ndërsa dyshohet se ka penguar zbardhjen e së vërtetës, shkruan “Panorama”.
Në momentin kur ndodhi vrasja, Malko ishte duke udhëtuar me makinën e tij tip “BMW”, ndërsa 1 furgon i bardhë i preu rrugën.
Më pas dy persona hapin zjarr ndaj tij, duke bërë që ish-polici të humbasë kontrollin e mjetit.
Në vendngjarje policia gjeti 9 gëzhoja, por dyshohet se është qëlluar me më shumë plumba.
Ndërkohë pak orë pas krimit, në fshatin Ferraj, autorët dogjën njërën prej makinave, për të humbur gjurmët.
Kur kanë kaluar më shumë se dy javë nga vrasja, policia ende nuk ka identifikuar asnjë autor.
Përsa i përket të shkuarës, Malko është konfliktuar në një sherr me vëllezërit Lashi në 2016-ën, për një borxh për lojrat e fatit.
Mirëpo policia e ka përjashtuar këtë pistë hetimi, duke qenë se familjet i kanë dhënë fjalën njëra-tjetrës që do ta mbyllin sherrin aty.
Gjithashtu Malko ishte i pranishëm mbrëmjen e 4 tetorit të vitit të kaluar në zonën e ish-bllokut, kur u vra Fabiol Gaxha dhe u plagos Ervis Martinaj.
Malko kishte rreth një vit që ishte punësuar në Inspektoriatin e Mjedisit dhe merrte rrogën pa shkuar në punë.
