Zv. Ministrja e Shëndetësisë, Mira Rakacolli, në një deklaratë për mediat, ka bërë me dije se viktima nga koronavirusi në Durrës ka qenë vetëm në dhomë.
Rakacolli shprehet se e moshuara vuante nga disa sëmundje të tjera, shkak për të cilin gjeti edhe vdekjen pas infektimit nga koronavirusi.
Ajo shtoi më tej, se po bëhet gjurmimi i personave të cilët kanë qenë në kontakt me të moshuarën.
“Mjekët që kanë pasur kontakte me të, u janë marrë analizat dhe po priten rezultatet, por ata janë të karantinuar tashmë. Pacientja ka qenë në dhomë vetëm. Dimë që të gjithë personat që kanë pasur kontaktet me të moshuarën po gjurmohen dhe po verifikohen të gjithë”, u shpreh numri dy i Ministrisë së Shëndetësisë.
Ka dyshime se 73-vjeçarja ka pasur kontakte me 16 infermierë, 23 mjekë dhe 6 sanitarë të repartit të Patologjisë, shkruan “Dosja.al”.
Mësohet se të gjithë këta persona nuk janë paraqitur në punë, ndërsa pritet përgjigja e analizave.
E moshuara u kthye në Shqipëri më 1 mars nga frika e karantinimit në Itali.
Dy ditë më vonë ajo u shtrua në spitalin e Durrësit.
73-vjeçarja nuk u ka treguar stafit të spitalit se ka qenë në Itali.
