Ditën e djeshme një person afër moshës 50 vjeçare në fshatin Fushë Alie të Dibrës ka humbur kontaktet me familjen.
Ndërkohë vijojnë kërkimet për 49-vjeçarin Tefik Xhika që dyshohet të jetë mbytur mbrëmjen e djeshme në ujërat e lumit Drin në Dibër.
Mësohet se Xhika kishte lënë makinën tek lokali i fshatit Fushë-Alie dhe kishte shkuar për të peshkuar në lumin Drin. Siç shihet nga pamjet një palë atlete janë në buzë të lumit, që dyshohet se 49-vjeçari i ka hequr para se të nisë peshkimin
Pasditen e djeshme dhe gjatë natës kanë kërkuar rreth 200 burra, dhe forcat e policisë, por pa rezultat. Kërkimet po vijojnë me gomone nga disa banorë në brigjet e Drinit. Mëngjesin e sotëm kanë rinisur kërkimet.
Riza Xhika, xhaxhai i Tefikut është shprehur se gjithë fshati është organizuar vetë për të kërkuar për 49-vjeçarin.
Ai u shpreh se ashtu siç e kanë traditë i gjithë fshati organizohet kur ka ndonjë problem, ndërkohë që sipas tij shteti nuk duket asgjëkund.
“Del zona komplet për ta ndihmuar.Nuk kam parë as emergjencë as ndihmë, vetëm nja dy-tre policë. Sot a sheh gjë këtu? Ndonjë polic apo ndonjë emergjencë. Kërkojë që shteti me mjetet e veta të specializuara të vendosë dorë, të na ndihmojë për të kërkuar Tefik Xhikën. Shteti i ka të gjitha mjetet e specializuara”, u shpreh xhaxhai i Tefikut në Fushë Alie të Dibrës.
