Gjenden në Përmet dy vajzat e mitura që u zhdukën në datë 1 janar 2021 në Tiranë.
Policia e Tiranës bën me dije se ka gjetur dy të miturat Kejsi Ahmetaj dhe Mojna Hajdaraj. Ato janë në gjendje të mirë shëndetësore dhe pritet të dërgohen drejt Tiranës.
Njoftimi i Policisë:
“Si rezultat e kontrolleve të vazhdueshme nga DVP Tiranë, në bashkëpunim me Komisariatin e Policisë Sarandë dhe Komisariatin e Policisë Përmet, paraditen e sotme u bë e mundur gjetja e dy vajzave të mitura që janë larguar nga banesa më datë 01.01.2021.
Vajzat janë në gjendje të mirë shëndetësore dhe ndodhen në Komisariatin e Policisë Përmet, ku do të merren nga shërbimet e DVP Tiranë dhe do të dërgohen nëpër banesat përkatëse”, njofton Policia.
Apeli i nënës
Një ditë më parë, nëna e njërës prej tyre bëri apel që të ndihmohej të gjente vajzën që është e sëmurë nga astma. Ajo ka hedhur dyshime se ajo mund të jetë gënjyer dhe rrëmbyer me qëllim trafikimin. Nëna me lot në sy, kërkoi që kushdo që ka dijeni për vendndodhjen e tyre apo që i ka parë të lajmërojnë policinë. Ajo gjithashtu u shpreh se edhe nëse vajza mund të jetë larguar vetë nga banesa, të hap telefonin dhe t’u thotë të paktën prindërve që është gjallë. Nëna deklaroi se vajza e saj është e sëmurë dhe prej 4 ditësh nuk ka marrë mjekimet e saj për astmën.
Dy vajzat e mitura u larguan nga banesat e tyre më 1 janar dhe nuk ishin kthyer më. Vajzat M. H. dhe K. A. të moshës 16-vjeçare, shoqe me njëra-tjetrën u kishin thënë prindërve se do të shkonin në banesat e njëra-tjetrës për të uruar Vitin e Ri, por më pas telefoni i tyre rezultonte i fikur.
/Gazetareforma.com/
