Shqipëria për ditë e më shumë të jep përshtypjen e një shteti policor.
Kjo gjë të bie në sy sidomos kurr qarkullon rrugëve të vendit, ku gati në çdo aks kombëtar por dhe jo vetëm, syri të kap shpesh postoblloqe apo patrulla policore.
Plot 105 shoferë u arrestuan nga Policia Rrugore në bashkëpunim me Policinë e Rendit vetëm brenda javës së fundit, në një kohë që u vendosën 11.880 gjoba për kundravajtje rrugore.
Patrullat e policisë rrugore, janë kthyer tashmë në makthin e shoferëve, ku shumë syresh nga një gjobë të thjeshtë që meritojnë në më të shumtën e rasteve, në fakt shpesh ngarkohen edhe me precedent penal.
Ajo që për ta duhet të ishte vetëm një gjobë për një kundravajtje rrugore, në vartësi të “humorit” të policëve, mund të kthehet edhe në bllokim dokumentacioni, sekuestrim automjeti, apo edhe deri në arrestim si një kriminel.
Në vetëm 7 ditët e para të këtij muaji, janë arrestuar 105 shoferë, ku gjysma e tyre u vunë në pranga vetëm ditën e martë.
Arrestimet nuk dihet nëse janë bërë me ndonjë urdhër të prerë që vinte “nga lart”, për shtim represioni, por gjithsesi janë bërë me pretendimin se drejtuesit e mjeteve kanë qenë ose në gjendje të dehur ose pa patentë.
Sipas të dhënave zyrtare të policisë rrugore, në këto shtatë ditë, janë vendosur edhe 11.880 gjoba, për një sërë shkeljesh, ndërsa 467 qytetarë tashmë kanë mbetur pa patentë, kryesisht për tejkalim shpejtësie.
Numri më i lartë i ndëshkimeve rezulton të jetë për parkimet e gabuara, e cila më pas ndiqet nga shkelësit që janë burim aksidenti, për parakalime të gabuara, përdorim celulari, mosvendosje e rripit të sigurimit, dhe drejtuesit e motorrëve që nuk përdorin kaskat mbrojtëse.
/GazetaReforma.com/
