Me goditjen e vendit tonë nga Covid-19, u ndërpre edhe transporti publik, sepse nuk mundëson ruajtjen e distancimit social e për këtë arsye ekspozimi i udhëtarëve ndaj virusit është i madh.
Tashmë që ka nisur rihapja e vendit dhe lehtësimi i masave, njerëzit janë të interesuar të dinë se kur do rikthehet transporti publik, nisur nga fakti se shumë aktivitetet ekonomike janë rihapur.
Ende nuk ka një datë të saktë se kur mund të rinisë puna, por operatorët e transportit publik kanë ndërmarrë disa masa për të siguruar distancimin fizik.
Kreu i Shoqatës Kombëtare të Transportit Qytetas, Rixhin Qoshja, në një intervistë për Report Tv ka zbardhur disa detaje mbi mënyrën e re të udhëtimit me transport publik, ku ndër të tjera ka thënë se në autobuse mos të udhëtojnë më shumë se 25 persona dhe për të shmangur kontaktin e pasagjerëve me faturinot propozojnë biletat elektronike.
“Ne jemi munduar që të bëjmë disa prova tona si operator bazuar në çfarë kanë bërë kolegët tanë në Europë. Kemi bërë disa modele, kemi ardhur në rezultatin që në një autobus nuk mund të qëndrojnë dot më shumë se 25 pasagjerë. Një nga opsionet thelbësore për të ruajtur distancimin social brenda në autobus është mënyra se si ne faturojmë biletën që e kemi me faturino, dhe me faturono është e pamundur që ta ruajmë këtë distancë. Një nga opsionet do të ishte biletimi elektronik por që nuk është diçka që zgjidhet në një kohë shumë të shkurtër, jemi në pritje”-u shpreh Rixhin Qoshja.
Sipas Qoshjes sistemi i biletës elektronike nuk do të sjellë papunësi të faturinove, pasi sipas tij, ata mund të integrohen në shërbime të tjera që vijnë si rezultat i implementimit të këtij sistemi.
“Fakti që do të implementohet bileta elektronike, dua ta theksojë që nuk është asgjë konkrete, nuk do të thotë që këto njerëz të dalin pa punë. Mbase do të integrohen në shërbime të tjera që vijnë si rezultat i implementimit të këtij sistemi”-tha kreu i shoqatës kombëtare të transportit qytetas.
Duke u bazuar në disa prej modeleve që janë aplikuar jashtë vendit, është bërë një organizim në sediljet për pasagjerët, si dhe do të jetë i detyrueshëm përdorimi i maskave dhe dorezave.
Qoshja shprehet do jetë në dorë të qytetarëve respektimi i masave, por zyrtarisht ende nuk ka një protokoll sigurie, teksa për operatorët e transportit urban duhet që puna të rinis sa më shpejt.
“Nevojë për ndihmë financiare do kemi patjetër, kjo është e sigurt sepse ne nëse rinisim nesër me këtë kapacitet të reduktuar që thamë do të thotë që ne gjenerojmë humbje në çdo ditë të punës, pra nuk flitet për fitim, që do të thotë falimentim. Kjo nuk do të përkthehet në rritje të çmimit të biletave pasi ne presim nga bashkia dhe qeveria për të gjetur zgjidhjen që ky aktivitet të mbijetojë pa rënduar tek qytetarët”-shpjegoi Qoshja.
Kujtojmë se ndërprerja e aktivitetit për shkak të pandemisë, ka futur në krizë edhe sektorin e transportit, teksa disa ditë më pare, kreu i shoqatës “Transporti Kombëtar Interurban”, Kujtim Mema u shpreh se shumica e transportit ndërqytetas është me kredi dhe një e dytë shtesë do të ishte shumë e vështirë për tu shlyer.
Ai kërkoi rifillimin e aktivitetit, pasi përndryshe sektori do të shkonte drejt falimentit.
