Një ngjarje e rëndë është sënuar sot në Tiranë, ku dy kalimtarë janë plagosur rëndë nga rënia e një skele në një pallat në ndërtim e sipër, në zonën e ish-Parkut të Autobusave.
Menjëherë pas kësaj publikimit të këtij lajmi, Policia e Tiranës ka zbardhur detaje se kush janë dy kalimtarët që u plagosën.
Policia shprehet se ngjarja ka ndodhur rreth orës 10:10, në bulevardin “Gjergj Fishta”. Nga rënia e skelës u plagosën dy kalimtarë, shtetasi me inicialet H. L., rreth 70 vjeç, dhe I. Sh., rreth 45 vjeçe.
Mësohet se policia ka shoqëruar në ambientet e komisariatit inxhinierin e pallatit, shtetasi K. S., dhe punëtorët N. S., dhe A. P., për sqarimin e kësaj ngjarjeje.
NJOFTIMI I POLICISË
Më datë 22.01.2024, rreth orës 10:10, në bulevardin “Gjergj Fishta”, janë rrëzuar skelat e nje pallati në ndërtim e sipër, dhe si pasojë janë dëmtuar 2 shtetas (kalimtarë) H. L., rreth 70 vjeç, dhe I. Sh., rreth 45 vjeçe.
Dy të dëmtuarit ndodhen në spital, në kujdesin e mjekëve. Në ambientet e Policisë janë shoqëruar inxhinieri i pallatit, shtetasi K. S., dhe punëtorët N. S., dhe A. P., për veprime të mëtejshme procedurale. Grupi hetimor ndodhet në vendngjarje dhe po punon për sqarimin e rrethanave të ngjarjes.
