Policia kufitare në portin e Sarandës ka bllokuar dy gomone ditën e djeshme dhe ka vendosur gjoba ndaj tyre, pasi qarkullonin pa certifikatën e operatorit turistik.
Drejtoria Vendore për Kufirin dhe Migracionin Vlorë njoftoi se ndërhyrja erdhi pas publikimit të një fotografie në rrjetet sociale, ku dy mjete lundruese me persona në bord shiheshin pranë bregut në zonën “Tre Ishujt”, në Ksamil. Shërbimet e Stacionit të Policisë Kufitare Port Sarandë shkuan menjëherë në vendin e raportuar.
Gjatë kontrollit, u verifikuan dy mjete: një gomone në pronësi të shtetasit E. M. dhe një motoskaf plastik në pronësi të R. L., të cilat po lundronin pa dokumentacionin e kërkuar për ushtrimin e aktivitetit turistik në det.
Zona ku ndodheshin nuk ka kufizime të përcaktuara, por mungesa e certifikatës për operator turistik përbën shkelje.
Të dy pronarët u ndëshkuan me gjobë nga 100,000 lekë secili dhe mjetet u bllokuan në mënyrë administrative në SPK Port Sarandë.
Drejtoria Vendore për Kufirin dhe Migracionin Vlorë deklaroi se do të vazhdojë kontrollet dhe monitorimin përgjatë vijës bregdetare, për të garantuar sigurinë, rendin dhe respektimin e ligjit në fushën e turizmit detar.
