Një sherr mes disa personave është regjistruar ditën e sotme në zonën e Ali Demit, në ambientet e një zyre elektorale të Partisë Social Demokrate në Tiranë.
Policia ka reaguar pas ngjarjes, duke konfirmuar se rreth orës 14:00 është marrë një telefonatë në sallën operative për një konflikt fizik në këtë zonë.
Sipas informacionit zyrtar, gjatë këqyrjes së vendit të ngjarjes janë gjetur dy fishekë luftarak, ndërsa xhami i zyrës së subjektit elektoral rezulton të jetë dëmtuar, dyshohet si pasojë e goditjes me sende të forta.
Autorët e përfshirë në sherr janë larguar me automjet përpara mbërritjes së policisë.
Në vendngjarje kanë mbërritur forca të shumta policore dhe grupi hetimor.
Hetimet janë në vijim për të identifikuar dhe arrestuar autorët, si dhe për të zbardhur shkaqet dhe rrethanat e konfliktit. Ngjarja po hetohet nën drejtimin e Prokurorisë së Tiranës.
