Të moshuarit të cilët jetojnë vetëm, ndodhen në një situatë të vështirë, pas urdhërit të ri qeverisë.
Ata nuk lejohet të dalin më nga shtëpitë, ndërsa për të mbuluar nevojat e tyre do të merren grupet e ngritura nga bashkitë.
Mirëpo një të moshuare në Vlorë, e cila ka kontaktuar me bashkinë e qytetit, nuk i ka ardhur askush në ndihmë.
Ajo shprehet për “Abcnews.al”, se ka dy ditë që pi ujë me sheqer, për të mbajtur frymën gjallë.
“Jam 84 vjeçe jam pa njeri fare në shtëpi. Po pi ujë me sheqer. Dhe do dal le të më marrë dhe të më fusë në bug policia se unë po rri pa ngrënë. I dërgova sekretares së Dritan Lelit dhe nuk e vuri ujin në zjarr dy ditë pa bukë, ujë me sheqer piva mbrëmë. Nuk më zinte gjumi. Sikur një dorë makarona të kisha të bëja supë. Unë nuk mund të kërkoj në lagje tani. Ose të më japin pensionin dhe të iki. Rama tha bëjeni në facebook, te Shqipëria që e duam shumë pikë al. Po ku di unë të shkruaj atë?! Unë do të ikja pa u ngopur në gropë! Nuk po më zë as koronavirusi, se unë kam dalë!”, thotë e moshuara.
Mesa duket, burimet njerëzore janë të pamjaftueshme për të mbuluar nevojat e 81 mijë pensionistëve që jetojnë vetëm.
Disa bashki të vendit, kanë kërkuar vullnetarë, për t’u shkuar në ndihmë të moshuarve.
Nisur nga kjo situatë, lind nevoja për një zgjidhje urgjente për të moshuarit, ku një opsion që mund t’i jepte zgjidhje këtij problemi, është caktimi i një fashe orare vetëm për lëvizjen e tyre.
Bilanci i COVID-19 në vendin tonë është 223 të prekur, në mesin e të cilëve 44 të shëruar dhe 11 viktima.
Gjatë 24 orëve të fundit janë shënuar 11 raste të reja nga 90 testime të kryera.
Aktualisht te spitali Infektiv ndodhen 77 persona, 7 prej të cilëve në gjendje të rëndë, ku 4 janë intubuar.
