Dy avionë të tjerë me shtetas afganë pritet të mbërrijnë në vendin tonë rreth mesnatës. Lajmin e ka bërë të ditur Ministria për Europën dhe Punët e Jashtme, e cila njofton se pasagjerët do të priten nga ministrja Olta Xhaçka. Mësohet se në total do të mbërrijnë 210 persona nga dy fluturime të njëpasnjëshme.
“Mirëmbrëma! Gjatë mbrëmjes së sotme priten të mbërrijnë në Tiranë dy fluturime të tjera me qytetarë afganë. Avioni i parë nga Kabuli pritet të mbërrijë pak para mesnatës e pas tij edhe avioni i dytë. Pasagjerët do të priten në pistë nga Ministrja për Evropën dhe Punët e Jashtme, Olta Xhaçka. Me uljen në pistën e Rinasit do ju bëhen me dije detaje të tjera. Planet brenda pistës do shpërndahen sa më shpejt të mundemi. Punë të mbarë të gjithëve bashkë!”- shkruhet në njoftim.
Bëhet e ditur se avioni i parë pritet të mbërrijë rreth orës 23:00 me 150 afagnë, ndërsa avioni i dytë do të ketë 60 persona. Pritet që afganët që do të vijnë sonte të strehohen paraprakisht në konviktet e Qytetit Studenti.
Avioni i parë me shtetas afganë u ul në aeroportin e Rinasit në orët e para të mëngjesit të sotëm. Në të kishte 121 afganë që janë akomoduar në disa hotele në Durrës.
