Në Durrës dhe në disa zona të tjera të vendit raportohet se prej disa ditësh ka mungesë të Metadonit për përdoruesit e drogës, që shpërndahet nga Ministria e Shëndetësisë.
“Të rinjtë, paralajmërojnë se do t`u rikthehen përdorimit të lëndëve narkotike, nëse nuk gjejnë metadon’, raporton Syri.net.
Këta të rinj, paraqiten çdo ditë pranë spitalit në Durrës, për të marrë dozën e metadonit, por prej javësh ky medikament mungon.
“Thonë që do vijë, po na gënjejnë ditë për ditë, asgjë s’po bëhet për ne. Kam mbi 20 vjet që e përdor drogën. Ndërsa Metadonin kam rreth 1 vit që e përdor, mirëpo tani nuk kam më mundësi finaciare për ta blerë”, u shpreh njëri nga përdoruesit.
Në Durrës janë rreth 200 persona që trajtohen me metadon, të cilët prej disa ditësh nuk e marrin këtë medikament. Nga spitali i Durrësit deri më tani nuk ka asnjë reagim në lidhje me mungesën e metadonit.
