Kreu i Federatës Shqiptare të Futbollit (FSHF), Armand Duka, ka folur për herë të parë në lidhje me takimin me kryeministrit britanik, Boris Johsnon, në Londër, gjatë finales së Euro2020. Në ABC, Duka u shpreh se i është ofruar atij duke iu prezantuar dhe më pas i ka bërë përshtypje se ai e njihte Shqipërinë si një vend të bukur dhe destinacion për anglezët.
“Iu vetëofrova dhe iu prezantova që jam nga Shqipëria. Më ka bërë përshtypje se ishte shumë i emocionuar për të fituar Anglia. Më foli për Shqipërinë. Më tha kam dëgjuar që është vend shumë i bukur dhe destinacion për anglezët”, tha Duka fillimisht.
Më pas, kreu i FSHF-së theksoi se i ka bërë përshtypje që disa figura të njohura në tribunën “VIP”, kanë pritur deri në fund të ceremonisë të ngritjes së trofeut. “Ajo që më bëri përshtypje që ishte edhe presidenti i Italisë apo David Beckham me fëmijët e tij. Ishte respekti që ndoqën ceremoninë deri në fund kur shumica e tifozëve anglezë u larguan.
Kisha në krah të djathtë Beckham dhe në krah të majtë kisha Nestan. Kur humbi penalltinë Italia mërzitej Nesta dhe kur humbte Anglia mërzitej Beckham. Stadiumet me ngjyrat e LGBT? Do preferoja ta ndriçoj stadiumin me ngjyrat e ekipeve. Stadiumi jonë nuk i ka këto kushte por shumë shpejt do ketë një sistem si “Allianz Arena”. Futbolli nuk ka pse të promovojë asgjë tjetër”, përfundoi Duka.
