Papa Françesku ka bërë thirrje për dialog për t’i dhënë fund konflikteve në Afganistan, në mënyrë që njerëzit të kenë mundësinë të jetojnë në paqe, siguri dhe respekt. Ai kërkon që secili prej tyre të kthehet në banesat përkatëse dhe të jetojnë në paqe.
“Unë bashkohem me shqetësimin unanim për situatën në Afganistan. Unë ju kërkoj që të luteni së bashku me mua për Zotin e paqes, në mënyrë që të mbarojë britma e armëve dhe të gjenden zgjidhje rreth një tryeze dialogu”, u tha ai pelegrinëve dhe turistëve në Sheshin e Shën Pjetrit.
“Vetëm në këtë mënyrë popullsia martire e atij vendi – burra, gra, të moshuar dhe fëmijë, mund të kthehen në shtëpitë e tyre dhe të jetojnë në paqe dhe siguri në respekt të plotë reciprok”, përfundoi Papa Françesku.
Situata në Afganistan – Militantët talibanë kanë marë pa luftë dhe kontrollin e qytetit të fundit, Kabulin. Një grup militantësh ka filluar të hyjë në periferi të Kabulit, i cili ishte i vetmi qytet që kishte mbetur në duart e qeverisë. Udhëheqësi i grupit të talebanëve ka deklaruar se nuk kanë ndërmend të luftojnë dhe se kush dëshiron që të largohet nga qyteti do t’u jepet mundësia për kalim të sigurt.
Ministri afgan i Punëve të Brendshme, Abdul Sattar Mirzakwal tha se do të ketë një “transferim paqësor të pushtetit”. Në një fjalim të regjistruar ai u shpreh se do të bëhet kalimi në një qeveri kalimtare pasi talebanët urdhëruan luftëtarët e saj që të përmbahen nga hyrja në Kabul.
