Policia greke ka “zbërthyer” gjashtë banda kriminale, të cilat kryenin vjedhje nga turistët dhe qytetarët në zonat e transportit, por edhe në trafikun e drogës. Aksioni nisi të hënën kur edhe u arrestuan gjithsej 50 persona. Gjithashtu, u identifikuan edhe 187 anëtarë të grupeve kriminale, 6 prej të cilëve janë të mbyllur në ambientet e paraburgimit, ndërsa njëri prej tyre është ekstraduar për llogari të autoriteteve të huaja. Anëtarët e grupit kishn trafikuar 16.5 kg kanabis, 1.5 kg kokainë dhe droga të tjera, e po ashtu kishin grabitur mbi 480 vjedhje nga turistët.
Çdo nëngrup kriminal kishte një fushë të specializuar veprimi dhe në veçanti dy nëngrupe vepronin në vjedhje në vendet turistike, një nëngrup në trafikun e drogës, një nëngrup në qarkullimin e kartëmonedhave të falsifikuara, një nëngrup në vjedhje nga ambientet e brendshme të makinave, ndërsa anëtarët e një nëngrupi kishin rolin e marrësve. Një nëngrup kriminal, i përbërë nga 94 persona, kryesisht me origjinë rumune, ishte aktiv në vjedhje. Pasi grabisnin, ata vendosnin “mallin” në vende të fshehta dhe ktheheshin në terren për të vazhduar aktivitetin e tyre. Pastaj me taksi, shkonin në pikëtakim për të grumbulluar mallini e vjedhur.
Për të mos u identifikuar përdornin veshje të përshtatshme dhe ndërronin vazhdimisht vendbanimin. Një nëngrup tjetër, i përbërë nga 34 persona, kryesisht me origjinë shqiptare, ka qenë aktiv në vjedhjet në rrugët e ngarkuara në qendër të Athinës. Anëtarët e nëngrupit të caktuar përdornin automjete me qira për transportin e tyre, ndërsa operonin kryesisht në linjën e metrosë Teatri- Aeroport, duke pasur kontroll të plotë mbi këtë zonë.
Bëhet e ditur se për zbërthimin e grupeve kriminale dhe përfundimin e veprimtarisë së tyre, ishin paraprirë veprime të tjera operacionale gjatë të cilave ishin arrestuar mbi 80 persona. Përfitimi ekonomik i paligjshëm i nëngrupeve kriminale në total e kalonte shumën prej 1.200.000 eurosh. Njëkohësisht, gjatë hetimeve u identifikua një anëtar i bandave si autori i vrasjes së mbetur në tentativë të tre shtetasve, e ndodhur më datë 16.12.2023 në Gazi, ndërsa vrasja e një të huaji, e ndodhur më datë 08.03.2023 në qendër të Athinës, ku përfshihet një nga të arrestuarit dhe një anëtar i identifikuar.
Të arrestuarit janë dërguar në Prokurorinë kompetente, ndërkohë që vijojnë hetimet për identifikimin dhe kapjen e anëtarëve të tjerë.
