Seksioni për Hetimin e Narkotikëve i DVP Tiranë, në bashkëpunim me disa institucione si Drejtorinë për Hetimin e Narkotikëve në DPPSH, Drejtorinë e Hetimit Doganor, Filialin Qendra Tranzite të Postës Shqiptare dhe Drejtorinë Vendore të Policisë Elbasan, ka finalizuar dy operacione për goditjen e trafikut të lëndëve narkotike.
Në operacionin e koduar “Destinacioni 1”, u godit një grup kriminal që trafikonin cannabis sativa nga SHBA në Shqipëri përmes shërbimit postar. U arrestua në flagrancë shtetasi E. H., 34 vjeç, dhe shpallet në kërkim shtetasi E. D., 24 vjeç. Gjatë operacionit u sekuestruan 2.3 kg cannabis sativa dhe 170 gramë kokainë.
Në operacionin “Destinacioni 2”, u godit një tjetër grup që trafikonin cannabis sativa nga Tajlanda në Shqipëri. U arrestuan shtetasit B. L., 19 vjeç, dhe një 17-vjeçar, ndërsa u shpallën në kërkim B. L., 18 vjeç, dhe E. L., 18 vjeç. U sekuestruan 1.7 kg cannabis sativa dhe para të gatshme.
Hetimet vijojnë për dokumentimin e plotë të veprimtarisë kriminale dhe identifikimin e personave të tjerë të përfshirë. Materialet janë dorëzuar në Prokurori për veprime të mëtejshme.
